اشكرك ازاي ....؟

من طرف **FARES** الإثنين 19 مايو - 9:18

مهما يارب اصلي .. واصوم واحج واسجد
عارف دايما ياربي .. اني في حقك مقصر
ومهما هقول او احكي .. عن نعمك يارب عليا
مش ممكن هقدر اوفي .. حقك يارب عليا

يارب كرمك زياده .. ورحمتك بينا عاده
اتعودنا عليها .. منك يا كريم

دايما بتحسن الينا .. وتملي تعطف علينا
عارفينك يارب حليم .. وغفور ورؤوف رحيم
ويارب رضاك علينا .. وانت السميع العليم

صحيح مليان عيوب .. وذنوب كتير وخطايا
لكن يارب عارف .. انك دايما معايا
بغلط كتير وبتوه .. عن سكتك وبروح
لبعيد وبرجع اتوب .. وبتشفيلي الجروح

بتغفرلي كل ما ادعي .. وهي دي الحكايه
رحمتك بينا ياربي .. ملهاش حدود ونهايه

عارفني يارب عاصي .. وعارف انا مستهلش
بس يارب عارف .. ان انت مبتكذبش
كرمك بجد وحقيقي .. ورحمتك ما بتفوتش
ولا عبد من عبادك .. وبجد ما بتقصرش

صحيح مابعبدكش .. زي ما نفسي اعبدك
او زي عباد كتير .. مـ الخلق بتعبدك
بس وجودك في حياتي .. مفيش اجمل من كدا
وبجد نفسي يارب .. اقرب اكتر من كدا

في حاجات بسيطه بعملها .. مش دايما بس عارف
مصدق احساسي فيها .. وبجد مش خايف
لإني يارب عارف .. رحمتك فوق كل شيئ
وايماني بيك ياربي .. بينورلي الطريق

محتاجلك دايما يارب .. وبدعيلك تهديني
وتثبتني أوي ع الحق .. يارب قويني
دنا مهما يارب ركعت .. وصمت ليك وسجدت
مش هعرف اشكرك....

واشكرك ياربي ازاي ...؟
ونعمة شكرك ياربي .. محتاجه اصلا لشكر ...!

سبحانك يارب

اصدقائي ..
كم مره دعانا فيها الله اليه ولم نستجيب..؟
وكم مره دعونا فيها الله واستجاب لنا..؟

استغفرك ربي واتوب اليك

اللهم لك كل الشكر والحمد كما ينبغي لجلال وجهك وعظيم سلطانك
يا مالك الملك يا ذا الجلال والاكرام
وحتى ترضى يا ارحم الراحمين , يا اكرم الاكرمين
يا خالق كل شيئ , يا رب العالمين